Bat jor shor se uth rahi hai ,pathshalaon me Yaun Shiksha ki. Akhir kyon ? Kahan se aaya ye vichar ? Shayad us adhunik duniya se, jahan ek 11 varsh ke bachche ko maan- baap kah dete hain, "bas bahut hua ab tum apana rasta khud chuno". Jara sochen, aisa bachcha kahan se samskar prapt karega,Yakinan bazar se ! Phir aise pashchimi samaj ke bachche ke liye pathshalaon me Yaun Shiksha ki baat ka shayad koi mayane ho sakta hai ! Kintu, hamare hahan jahan janam ke baad maran tak aur marne ke baad bhi vyakti us parivar ka ang mankar pooja jata hai, kya use is tarah ke kisi samskar ki avashyakta pathshalaon ke madhyam se diye jane ki koi jarurat hai ? Hamare yahan to umra ke har padav ke manovigyan ke anusar vyaktitva nirman ke liye samskaron ka ek sundar paimana hai. Garbhadhan se lekar agnisamskar tak sara kuchh intejaam parivar me hota hai. Parivar ki maryadaon me hamare samskar hamare laukik aur alaukik dono vyaktitvon ko nikharte hain Jisme vyakti ke bhautik jagat ke saath-saath uske adhyatmik jagat ko bhi savara jata hai. Ye sare samskar hamare un manishiyon ne hame virasat me diye hain jinka gudh gyan vyaktitva ke har pahloo ko avashyakta ke anusar samvarta aur banata hai. Phir Pathshalaon me nanhe bacchhon ko jo mansik roop se jis dharatal ke liye taiyar hi nahi use is disha me prerit karne ka kya auchitya hai. Jara sonche is gyan se kya pashchimi samaj ka bhala hua hai ? Vahan schooli bacchhiyan avaidh santati utpanna karne ke gunahgaar ban rahi hain jo aaj us samaj ki ek badi samasya ban gai hai, phir hamare yahan aisi betuki baat kyon uthai ja rahi hai ?